وسط الاوضاع الحزينه الي احنا فيها للاسف أنا في قمة السعادة من كل اللي بيحصل في العالم ده لمصر.
وقبل ما تهاجموني وتقولولي إن مصر خسرانة اقتصاديًا أو إن المنطقة كلها بتولع، لازم نفهم حاجة مهمة جدًا… الدول مش بس بتكسب فلوس، الدول بتكسب خبرة وقوة ومعلومات، والحاجات دي أحيانًا بتبقى أغلى بكتير من مليارات الدولارات.
مصر دلوقتي ممكن تكون خسرت اقتصاديًا في بعض الملفات، لكن في المقابل كسبانة ثروات هائلة عمرها ما كانت تحلم بيها، وكسبانة في آخر 50 سنة أكبر مكسب استراتيجي ممكن دولة تحققه بدون ما تدخل حرب واحدة. مصر دلوقتي غرقانة في المكاسب اللي مالهاش حصر… وتعالى أقولك إزاي.
-أول مكسب حقيقي مصر بتاخده هو إن عندها دلوقتي فرصة تشوف قدرات كل الأطراف بشكل عملي مش نظري. طول عمر الدول بتصرف مليارات عشان تعرف قدرات خصومها الحقيقية، تعمل simulations، تشتري معلومات استخباراتية، تتابع تجارب صواريخ، تحلل تدريبات… النهارده مصر شايفة ده كله live قدامها بدون ما تدفع تمن الحرب نفسها.
مصر دلوقتي بتشوف أداء الدفاعات الجوية الحقيقية تحت ضغط، مش في مناورات. بتشوف مدى تحمل الأنظمة ضد saturation attacks. بتشوف المسيرات لما بتستخدم بأعداد كبيرة. بتشوف الصواريخ الدقيقة لما تدخل في معركة طويلة مش ضربة واحدة. بتشوف إزاي الدول بتدير المعركة لما الموارد تبدأ تقل.
النوع ده من المعلومات كان ممكن ياخد من مصر 20 أو 30 سنة عشان تجمعه، ومليارات الدولارات عشان تفهمه، النهارده بيتحط قدامها ببلاش.
-ثاني مكسب ضخم هو فهم limits القوة. لأن أهم حاجة في أي توازن عسكري مش إنك تعرف مين قوي… لكن تعرف لحد فين قوته توصل. كل دولة عندها صورة إعلامية، لكن الحرب هي اللي بتكشف الحقيقة. بتكشف مين عنده endurance ومين لأ، مين يقدر يكمل ومين يتعب، مين عنده depth في المنظومة ومين بيعتمد على صورة أكبر من حقيقته.
المعلومات دي بتعيد تشكيل أي عقيدة عسكرية لأي دولة ذكية بتراقب.
-ثالث مكسب مهم جدًا هو إن مصر خرجت من دائرة الاستنزاف المباشر. في game theory أحيانًا أكتر لاعب بيكسب مش اللي بيضرب، لكن اللي بيخلي غيره يستنزف نفسه وهو بيحسب ويتعلم ويعيد ترتيب أوراقه.
اللي بيحصل دلوقتي إن قوى إقليمية كبيرة بتستهلك موارد، قدرات، تركيز سياسي، وطاقة اقتصادية. ومصر في المقابل بتراقب، بتفهم، وبتقدر تبني استراتيجياتها بناء على بيانات حقيقية مش افتراضات.
-رابع نقطة مهمة جدًا هي المكسب السياسي. كل ما المنطقة تدخل في توتر، قيمة الدولة اللي تقدر تتكلم مع كل الأطراف بتزيد. مصر دلوقتي واحدة من الدول القليلة اللي عندها علاقات متوازنة مع أطراف كتير، وده بيخلي وزنها السياسي يزيد لأن أي ترتيبات إقليمية لازم تعدي على الدول اللي عندها قدرة توازن.
وده بيرفع قيمة مصر في ملفات الوساطة، وفي ملفات الترتيبات الأمنية، وفي ملفات الاستقرار الإقليمي.
-خامس مكسب ناس كتير مش واخدة بالها منه هو المكسب العقائدي العسكري. لأن الحروب الحديثة أثبتت إن شكل الحرب اتغير. بقى فيه:
حرب مسيرات
حرب سيبرانية
حرب بنية تحتية
حرب طاقة
حرب نفسية
وحرب معلومات
وحطلي تحت دول ١٠٠ خط وحط تحت شركات التكنولوجيا الناشءه الي لازم تطلع من مصر الف خط.
الدولة اللي بتتعلم من غير ما تدفع تكلفة الحرب نفسها بتكون في وضع ذهبي لو عرفت تستوعب الدروس صح.
-سادس نقطة مهمة جدًا هي إن مصر بتشوف الاقتصاد وهو بيتحول لسلاح. ضرب الطاقة بقى جزء من المعركة. تعطيل الممرات بقى أداة ضغط. سلاسل الإمداد بقت targets. ده بيدي لمصر فهم أعمق إن حماية الاقتصاد بقت جزء من الأمن القومي مش ملف منفصل.
-سابع مكسب هو المكسب المعنوي الاستراتيجي، مش المعنوي الإعلامي. فكرة إنك بتشوف المنطقة بتتغير قدامك وبتقدر تقرأ المشهد بهدوء بتدي ثقة لمؤسسات الدولة في تقديراتها. لأن أخطر حاجة على أي دولة إنها تبني تقديراتها على propaganda مش على data حقيقية.
لكن لازم أكون واضح… ده مش معناه إن مفيش خسائر. فيه ضغط اقتصادي واضح. فيه تأثيرات على الطاقة. فيه تحديات. لكن الدول الكبيرة بتفكر بمنطق مختلف… هل الخسارة دي short term مقابل مكسب استراتيجي long term؟
لو مصر قدرت تحول المعلومات اللي بتشوفها دلوقتي لعقيدة، لتحسين تخطيط، لتطوير أولويات، ولتحديث تفكيرها العسكري والاقتصادي… ساعتها فعلًا هنكون قدام واحد من أهم المكاسب الاستراتيجية غير المباشرة في تاريخها الحديث.
الخلاصة إن اللي بيحصل حوالينا مش بس حرب بين دول… ده كشف حساب لقدرات المنطقة كلها. والدولة اللي بتعرف تتعلم من غير ما تتحرق هي الدولة اللي بتطلع أقوى في النهاية.
والسؤال الحقيقي مش هل مصر كسبت ولا خسرت دلوقتي…
السؤال الحقيقي: هل مصر هتعرف تستغل الدروس دي صح؟
لأن لو استغلتها صح… المكسب الحقيقي لسه جاي واكبر من احلامنا أن شاء الله.
ربنا يحمي بلدنا وينصرنا علي أعداءنا.
No comments:
Post a Comment