Nasser AbdulhaKeem Amer Army Air

 كشف حساب ابويا في البنوك😱😱

اسرار من الماضي علمتني اعظم درس في حياتي..

من يوم ما اتولدت ، لم اري ابويا ظابط الا في الصور بس☝️ كل اللي كنت اعرفه ان ابويا كان لواء طيار عظيم و يشبه نجوم السينما زي كلارك جيبل .. 

غير كده كان قارئ مثقف و موسوعي المعرفه يفهم في الفن و الادب و متحدث جذاب جدا لما يحكي في تاريخ الحضارات و المعلومات و تلاقي مكتبته باشكال الادب الفرنسي و الروسي و طبعا طه حسين و العقاد و توفيق الحكيم و كتب عن نظريه النسبيه و تاريخ الحضارات و الثقافات المختلفه..و يفهم في الاتيكيت و الاصول..

و كان حازم و عنيف و له شنه و رنه .. معتز بنفسه بزياده ، و كان علي خلاف دائم مع المشير عامر و بطانته من رجال مجلس قياده الثوره ..

اصطدم بهم في عده مواقف خلافات و ان عبد الناصر كان معجب ب ابويا و شايفه صح لكن قال له مقدرش ازعل حكيم عشان خاطرك و لا استطيع الوقوف في صفك.. 😞😞

انتهي انه قدم استقالته و ترك سلاح الطيران و هو في عز مجده نهايه الخمسينيات.. 

و عرفت كمان ان ابويا كان له دور كبير في تطوير سلاح الطيران و انشاء مطارات حربيه علي مستوي مصر و انظمه الرادارات الحديثه.. لكن خلافه مع قاده الطيران وقتها من شله حكيم ادي الي استقالته و ترك الخدمه و كان يادوب عريس جديد و خلف طفل اسمه اسامه..لانه اتجوز امي و هو عنده ٤٠ سنه. 

طيب يعيش ازاي و يجيب فلوس منين ؟ 

المعاش كويس بس لا يرضي طموحات ابويا في عيشه رفاهيه ثريه..

ف راح اشتري حته ارض في الصحراء نواحي الجيزه و استصلحها من ارض بور لتكون عزبه مثمره تطرح مانجه و موالح و كانت من اشهر العزب في المنطقه و كان جارنا عزبه الخواجه جروبي و اصحاب ابويا انكل كمال الشايب و كمال حماده😍

ابويا كان عنده حصان يرمح به في انحاء العزبه ..يرتدي قبعه كاوبوي و عاش دور جون واين في الافلام الامريكاني ..

العزبه دي كانت دي مصدر رزقنا و برضه فشخره لنا ، بنعزم فيها العيله و الاصحاب..

بس طبعا مش زي عزب الاقطاعين ذوي الاملاك.. يادوب كانت ٤٠ فدان في الصحراء و فاكر كويس بابا كان بيحكي انه اشتراها ب ٢٨٠٠ جنيه وقتها..

ابويا كان راجل نوزهي و شيك و مثقف جدا و صاحب مزاج.. كنا ساكنين في افخم عماره وقتها و كان من جيرانا عبد الحليم حافظ و صفوه المجتمع المصري من اطباء و اعيان..

كنا عايشين مستورين.. صحيح عنده عربيه امريكاني 6 متر و ساكن في شقه ع النيل و لكن لم نكن من الاغنياء و يادوب مستورين و حتي ساعات كنت احس ان ابويا بيبذل مجهود كبير عشان لا نشعر بضيق المصاريف و نظل في مستوي اجتماعي مناسب..

المهم، كنت ساعات اقابل ناس يقولوا لي، معقوله ابوك معملش ثروه من موقع عمله؟؟ دا كان تحت ايده كل قرارات تجهيزات الطيران و المطارات و دي بيبقي فيها عمولات خياليه و برضه رسمي او من تحت الترابيزه..

مضحكش عليكم ، كنت ب اصدق الكلام ده و اقول في عقل بالي، اكيد عنده قرشين حلوين في بنوك سويسرا او تحت البلاطه و مش عايز يقول لنا؟ كنت متشكك ، ياتري في اسرار لا اعرفها و لا ايه؟

و لما دخلت الجامعه و طلبت يشتري لي عربيه ، حسيت قد ايه هو بيحب ابنه و بيضحي عشان يخليني في مستوي اجتماعي زي زملائي في الكليه و باقي العيله ،،اضطر يبيع عربيته هو عشان يجيب لابنه الوحيد عربيه جديده؟؟

 

برضه الشك فضل جوايا، طيب ياتري هو بيخبي عني ان معاه فلوس ؟ و لا بخيل و مش عايز يصرف ؟ و لا هو فعلا معذور و عايشين مستورين ع القد؟؟

الي ان يشاء القدر ان يكشف لي حقيقه الامر 😯😯😯😯

ايام الجامعه كان عندي صديق اسمه اسماعيل مدني.. صاحبي من ايام المدرسه بس انا دخلت كليه طب و هو هندسه..

اسماعيل من اسره محترمه جدا و ابوه رجل اعمال محترم جداً و من الاثرياء ، و كان يسكن في فيلا فاخره في المهندسين..

و ذات يوم دعاني اسماعيل لحضور فرح اخوه محمد الكبير و اللي عرفت انه سيتزوج ابنه مقاول شهير حاجه كده زي عثمان احمد عثمان وقتها🤭🤭 و كانوا يسكنون في فيللا فاخره في مصر الجديده علي طريق العروبه🤩🤩..

الفرح كان في حديقه الفيلا .. انبهرت جدا بالفخامه و الثراء و الشياكه ..

و بينما اصافح والد العروسه ذلك المقاول الشهير، قدمني إسماعيل قائلًا ؛

- دا صاحبي اسامه شوقي و كنا بنذاكر سوا في بيتهم اللي ع النيل و ابوه لواء طيار بس راجل شديد قوي😂😂

فوجئت بالمقاول الكبير يقطب حاجبه و يصمت برهه وكأنه يسترجع صور من الماضي و بصوت مفعم بالدهشه و ممزوجاً باحترام شديد؛

- انت ابن سياده اللواء احمد شوقي؟

فرحت قوي و هو بيقول لفظ " سياده اللواء" و انتفخت اوداجي مفتخرا امام اللي واقفين حولنا🤭🤭

- ايون يا انكل.. بابا كان لواء في الطيران بس انا عمري ما شفته لابس ظابط الا في الصور😂

تنهد المقاول الكبير و وضع يده علي كتفي و نظر في عيني بصدق؛

- ابوك ده لم و لن يتكرر ابداً ☝️و انت لازم تكون فخور انك ابن الراجل العظيم ده..

تعجبت من مقولته و شعرت ان ورائها قصه!!

جذبني المقاول الكبير جانباً لنجلس علي طاوله بعيدا عن صخب الفرح ؛

- تعالي احكي لك سر كبير..

انا كنت في بداياتي مقاول شاب و نجحت في الفوز بمناقصه انشاء مطارات كذا و كذا ( عفوا لن اذكر تفاصيل سريه، اسامه) و بعد انتهاء العمل، تماطل الجيش في تسديد باقي فلوسي و سعيت في كل الاتجاهات بلا فائده .. 

ثم نصحوني الجأ لوالدك و هو اعلي جهه مسؤله في سلاح الطيران ممكن يحل لي مشكلتي..و لما دخلت مكتبه حسيت بهيبه و عظمه و تلعثمت.. ابوك لم يتكلم كثير .. بل نظر في ملف الاوراق و راجعه بدقه ، ثم رفع سماعه التليفون و اعطي امر فوري بانهاء الحسابات و تسليم مستحقاتي فورا.. و مجازاه المتسبب في تعطيل مستحقاتي 😯😯 و لما حبيت اشكره و لساني معقود بالجميل.. شخط فيا و قال لي .. اتفضل مع السلامه..

بعدها بعام ، ابوك اتجوز و خد شقه في عماره ع النيل و انا كنت مقاول العماره، ابوك طلب تشطيبات خاصه و دهانات و امور بتكاليف اضافيه..

لقيتها فرصه ارد الجميل 🙏🙏 و اعمل معاه واجب.. و لما قابلته عند تسليم الشقه و طلب فواتير الحساب و المصاريف، رددت بامتنان؛

- يا باشا دا اقل واجب نعمله.. انت خيرك علينا سابق و لولاك كان اتخرب بيتي ..

لقيت ابوك زي الاسد الهصور بيبص لي بنظرات عيون خليتني اتجمد مكاني و شخط فيا زعيق و شد من ايدي الفواتير و بص فيها و راح كتب شيك بالمبلغ كاملا و طلع المحفظه اداني ٥٠ جنيه و قال دي اكراميه للعمال بتوعك..و نزلت من عندكم مش عارف اقول ايه🤭

🙏🙏🙏🙏🙏🙏🙏🙏

شعرت بنبرات صدق و اعجاب شديد في حديث المقاول الشهير.. اسماعيل صاحبي ضحك و خبط علي كتفي و قال؛

- دا ابوك شديد قوي يا أُس😂😂

رجعت البيت فرحان و حكيت القصه لابويا و امي.. حسيت قد ايه ابويا فرحان ان صورته محترمه و عاليه امام ابنه.. حسيت قد ايه هو كان نفسه ان ابنه يراه في مجده و عظمته 😞 و شعرت به يقاوم دموعه حتي لا اراها🥲

تمر السنوات و نكبر و اعرف اسرار اكتر..عرفت حسابات ابويا في البنوك..

كل اللي كان حيلته ، ٥٠٠٠ جنيه كتبهم باسمي، و ٥٠٠٠ جنيه ب اسم سميه و اميمه..

عشنا حياتنا في اعلي مستوي اجتماعي… لم نكن من الاثرياء المرفهين و لكن افضل تعليم و احسن تربيه..ماما تفصل الهدوم بنفسها في البيت علي احدث موديلات.. الجمعه نتغدي في ابو شقره او نادي الجزيره.. و نادرا نروح الهيلتون لجل بس الشياكه .. .. نصيف في اسكندريه ، عندنا كابينه في ميامي و ناكل سمك في ابو قير و ساعات نتفشخر و نتغدي في اتينيوس او مطعم نصار.. نروح سينما مترو و احيانا المسرح ..ماما تاخدنا مسرح البالون نحضر عروض فرقه رضا..

.. لم يحرمنا من اي رغباتنا اطفالاً و كباراً.. ثم لاحظت بعد ان كبرنا تدهور في شياكه ابويا بعد ان كان يجلب قطع القماش من انجلترا كووب انجليزي و يفصل ملابسه عند ترزي النحاس باشا، اصبح قانعا بملابس عاديه في سبيل ان اولاده يظهروا بافضل مظهر اجتماعي..

اصبح زاهدا في متع الدنيا .. يسمع قرأن الشيخ رفعت في الفجر و مواظب علي الصلوات .. و كان مطلع بعمق في الكتب السماويه و دايما يحكي لي قصص من التوراه و الانجيل ..

كانت متعته و تسليته الوحيده و عشقه الكبير هي العزبه.. يقضي فيها معظم اوقاته ، يصحي الفجريه يصلي و يسمع الشيخ رفعت و يعمل لنفسه الفطار و يجلس في تراس الفيلا يتأمل .. يقرأ .. يقابل الفلاحين اللي بيشتغلوا و يتبسط نعاهم و يحكي معاهم.. لم يكن له اصدقاء يقابلهم و يخرج معاهم..

..كبرنا و كبر بابا و لما بقيت دكتور و بدأت حياتي العمليه، سألني؛

- هل حتلتزم و تراعي الارض و الاشراف علي العزبه..

اجبته بالنفي و ان حياتي ستأخذ منحي اخر..

فاضطر حزينا ان يبيع العزبه ، و وزع فلوسها علينا كلنا، و عمل تصرف اعتقد نادرا من يعمله، اعتبر زوجتي واحده من بناته و خصص لها نصيب زيها زيهم بالظبط..

انشغلت عن ابويا و هو اختار ان يقضي معظم ايامه في الاسكندريه شتاء و صيف.. ينزل كل يوم يتمشي ع البحر لوحده.. ثم يجلس علي كرسي امام بلاج سيدي بشر يحتسي الشاي مع البسطاء و العمال..

يدير معهم حديث و يتصاحب علي الناس الطيبين البسطاء.. 

ثم يعود للبيت يطلب الغذاء من محل السمك اللي تحت البيت الغداء ، سمك مشوي بالليمون و الملح دون خلطه و لا بهارات..يشرب الشاي و يجلس وحده يجتر ذكريات السنين..

عاش ابي كما لم يعيش احد و غادر الدنيا بدون ضجه و لا هيلمان..بعد فقده شعرت ان الزمن توقف و ان الدنيا لن تصير كما كانت..و الي الان لازلت اشعر به موجود و اكاد ارفع سماعه التليفون اطلبه و انتظر صوته القوي المميز المفعم بالثقه و القوه و الرجوله ..

و غادر اللواء شوقي الدنيا مستوراً و ترك لي ميراثاً لا يقدر بثروات الدنياً

اسامه شوقي

مصر

https://www.facebook.com/share/1E4fuXByDC/